آخر نقطة (باللغة المحكيّة اللبنانية)
اليوم نطَرت الساعة 11
و عارِف إنِّك مش جايي...
شافو عيوني نجوم الظهر
بسَقف القوضة مضوّاية...
قطفتلّك مِنهم وحدِة
بعتتلك معها بَوسة
و كم كِلمة عن قصّة حبّ
بعدها بقلبي مخبّاية...
بعرِف إنّو القصَّة خلصِت
بعرِف إنّو طلعتي منّي
لكن هيدي نقطِة حبّ
بعدها بكعب الكبّايه.
...
اليوم نطرت وما بعرِف
شو الّي نطّرني كرمالك.
مع إنّي متأكّد إنّي
ما لَح أخطُر عا بالِك.
و بعرِف لاحايبيض الدّيك
ولا لَح بوسك عا تمِّك
ولا حتّى فيلي حا يطير
تا يوصّلني لعندك
...
اليَوم نطَرت و مِش نَدمان
عالنطرَة شو ما كانِت
نطرة ذكّرتني فينا
عن لحظة إجِت وراحِت...
عن تاريخ بقلب اللحظة
عمرها اللحظة ما ماتِت
و هالنقطة بكعب الحقيقة
شرِبتها وريتها ما كانِت...
...
عدنان خليفة
2016
ليست هناك تعليقات:
إرسال تعليق