ياهل الصعيد ..!!
حاله غريبه أوى مشفتهاش فيكم
من بعد عمر طويل وكنت جار ليكم
لا بترحموا سني ولا همكم عهدي
ماتت ضمايركم والنخوة فين فيكم
بتجرودني ليه م الستر والعفه
وكشفتوا ليه جسمي بنداله وبــ خسه
ملعون أبو اللى غدر وميل الكفه
ميزانكوا ليه أتقلب وغدرتوا بأيدكم ؟
أنا كنت عمه لكم وكمان أنا الخاله
إيه اللي بس جرى غيرتم الحاله
وخونتوا ليه العهد وبيقتوا خوانه
كشفتوا ليه ستركم ظهرت بلاويكم
لوكنت يوم أخطأت تعالوا حاسبوني
لكن عملكوا خسيس عاوزين تذلوني
حتى كلام دينكم مقالش عروني
وصى علينا النبى أخوان نكون ليكم
لا يوم غدرنا ببعض والأرض واسعه لنا
كنا نداوى بعض .. فى مرضنا وزعلنا
حتى الصغار مع بعض وبيوت تساع إلنا
نسيتوا ليه أصلكم وأنا دمي منيكم
ده راح هيجى اليوم وهشكى للخالق
هو الشهيد مطلع على كل من خَالق
يجيب لى حقى هنا لا أضرب ولا أتخانق
ولأنكم مني برضه السماح ليكم
الدم عمره فـــــ يوم ماراح يكون مَيه
سماح لوجه الله لا غرامه ولا ديه
الدين ده دين ربنا والرك ع النيه
بس في يوم أعرفوا أن أحنا سواسيه
مسلم مسيحي سوا وأيدينا بأيديكم
ونكون لبعض السند فى الشده نبقى كـــ فرد
نحمي كمان البلد ونصون لبعض العرض
نعبد إله واحد ربك ده خلق الارض
ونعيش سوا بسلام والمولى يراضيكم
ـــــــــــــــــــــــــــــ
بقلمي أحمد هلال
