::::{ غنوة الموال}::::.....بقلم .....د/ سمير فوزي عمر
مَدَة الايدين للخلق.....
والكفوف فاضية
يعطيكي إيه الحَلق.....
ياصابرة ياراضية
عاشقة سواد الليل ...
والدمعة ف الموال
وانتي غُناكي جميل....
والشمس ليها دلال
دا الحزن ياام النيل.....
الفرح منه عليل ...
والضحكة ماتنطال
أستحلفك بالله....
ياشاغلة ليا البال
تطفي شموع الآه....
وتغني ف الموال
قولى لكل البشر....
أنا ع الزمن قادرة.
وكل شامت فشر....
للعزم مُش هاجرة
انا مصر ام الهرم
ام "نجيب" و"زويل"
ماعمر عزمي انهزم...
ولا ابني عوده هزيل
ولا صرح ليًا اتردم
ولا شاف دموعي ليل
انا مصر ام الكرم
وما انحني لعويل
وان كان ف يومي غمام
من غيمي هصنع جيل
يزرع قلوب الصخر...
تطرح ضيا قناديل
زينة الكلام أفعال...
ياسامعين القول
يالا معايا امال....
نزيًن الاقاويل
نزرع غيطان وجبال....
ونبني حلم جميل
يكون لمصر جمال...
ويكون لنا ...
.............مواويل
................................."من ديواني............عامية سمير فوزي"
ليست هناك تعليقات:
إرسال تعليق