** همسات رمضانية **
** تسريب امتحانات الثانوية العامة **
تعبان انا طول السنة
وطموحي سابق خطوتي
ثانوية عامة مطحنة
محتاجة جهدي وهمتي
الحاجّة تدعي ليل نهار
يارب اشوفك محترم
وابويا باع ورث وعقار
ومن الدروس جيبه اتخرم
كتر المذاكرة هدّني
ولبست نضارة نظر
والضهر شكله بينحني
والصحة ضاعت مالسهر
وجه معاد الامتحان
من بعد جهد ومرمطة
عاللجنة رحت و في المكان
لقيت عيال متنططة
و مافيش قلق على وشهم
ولا حتى في أي اهتمام
و انا اللي مرعوب وسطهم
زي الغريب وسط الزحام
وشوية جابوا الأسئلة
و اللجنة كانت مرعبة
الأسئلة متلتلة
ومعقدة ومهببة
سميت كده برب الفلق
وبدأت افك المعضلة
لقيت عيال ماسكين ورق
وفيه جواب الأسئلة
و اللجنة سابت نفسها
و الغش اصبح للركب
ولا فيش مراقب لمّها
حتى الحمار غش وكتب
حبة عيال من فصلنا
طول السنة صايعين سوا
حلوا الإجابة قبلنا
وكله غش وفهلوة
أتاري إن الإمتحان
من قبلها كان عندهم
وسربوه ولاد الحرام
ولا فيش حكومة تهمهم
حطيت دماغي عالورق
ودموعي نزلت عالبلد
مجهود شهور ضاع واتسرق
وفلوس دروس مالهاش عدد
إبن الذوات والمرتشي
لعبوها غصباَ عننا
وان قولنا عيب قالوا اختشي
هو انت باشا زينا ؟
مستني طب يزبطك
أو شرطة تقبل حضرتك ؟
ده كشف هيئة يسقطك
عشان وظيفة عمتك
مستقبلي أصبح عدم
والحلم ضايع في الهوا
أصل النظام يا محترم
انك تعيش بالفهلوة
خرجت ألعن في البشر
ولا عدش حد يهمني
ان شالله أهاجر للقمر
أو دولة تاني تلمني
** همسات رمضانية .. محمود بيومي **
ليست هناك تعليقات:
إرسال تعليق